地址－Coffee Break (將軍澳)
將軍澳常寧路2號TKO Gateway東翼1樓E169-E170號舖
💋菠菜煙三文魚芝士薄餅，一上菜時覺得都幾足料，芝士味濃，份量又慷慨，岩晒我呢D芝士愛好者，正。餅底係用脆底薄餅，同芝士，煙三文魚都幾夾，唔會搶左大家的味道，值得一讚係佢煙三文魚應該用上高質貨，唔會死鹹，就咁啪都接受到，唔錯。
💋英式全日早餐，落單時侍應提醒左我地話薯餅賣晒，轉左薯條，仲好，諗住另外再叫薯條食，而家慳返，佢薯條炸得幾脆身，唔似連鎖店咁淋晒，口感好好。腸仔方面都幾有驚喜，雖然睇上去有D皮甩左，唔太脆身，但味道幾好，唔多覺有味精味，揀得唔錯，但建議注意一下煎的方式。炒蛋方面，佢加左D黑松露上面，提升左唔少味道，D蛋炒得都幾滑同埋都幾鮮色下，應該唔會用D太平的雞蛋。值得一提係佢個牛角包，佢上黎時個樣幾扁下，我唔知佢上菜時受過咩遭遇啦，一咬落去就覺得應該擺左好耐下，凍晒，如果佢上菜前翻熱一下我相信好好多！
💋水蜜桃果粒茶，佢成Set野連埋蜜糖跟埋，我覺得有點多餘，唔加落去都唔酸，而水方面可能唔太熱，唔能夠令到蜜糖同茶充份咁融合，去到最尾一啖連埋蜜糖一次過飲就甜到令人即時醒晒，一係佢就唔好跟蜜糖，一係就D水熱D，令佢地可以融合得更好。
💋繽紛樂朱古力，我見到Menu有呢杯野，跟餐都只係加$18，所以即叫，出黎效果首先比2條繽紛樂吸引左，二話不說即分享左佢，之後至飲野，原來佢係一杯沙冰黎，甜度剛好，唔會話好甜，但其實飲落只係一杯普通的朱古力沙冰，同幻想中會有榛子味的同(定其實係我飲唔出呢??)佢面個層Cream幾重奶味，如果鐘意奶味的朋友應該幾鐘意，我就略嫌佢重左D。
