valensisme

排序:鲜花数点评(12 )

广州酒家(文昌总店)

广州荔湾区文昌南路2号(近上下九)

• valensisme
• 口味:3
• 环境:3
• 服务:2

好少会去广州酒家食饭，因为觉得有少少贵啦，但喺饮茶就成日会去。so，以下既剩系讲饮茶，饭市我无咩去，就唔讲了。

早茶如果喺周一至周五去，虽然都要等位，但喺都唔使等好耐既，但系如果系周六日，特别喺D节假日既话，想去饮茶，就要早D起身去等位了，唔系有排等吖~~

但喺，虽然系要等位，又比附近既老字号陶陶居吖，莲香吖咁要贵，但系佢都系值既。

分三层，一楼既唐人街有少少似港式茶餐厅既格局，想体验传统既广州味道，都系上去2楼或者3楼喇，但系3楼又比2楼贵少少喔，嘻嘻。。。所以我一般都系去2楼。

基本上我觉得佢既点心水准都好好，钟意食边样既，是但点，出黎都唔会差。推介几样。

夏天去，首先试试荷叶饭啦，剩系夏天有新鲜荷叶果阵先有得食，过左时候就无啦，个人觉得依家D米好似唔算太靓，但喺我又确实搵唔到边度仲有荷叶饭食，曾几何时系未装修之前既泮溪试过，超级地难食，所以，都算喺甘啦。。

另一个要试既就系拉肠，虽然拉肠周街都有得食，但喺用布蒸既已经唔多，而且粉浆够“杰”，蒸出黎既粉先够硬身，一路都话银记拉肠靓，但系我就睇唔上银记，真系要食布拉肠，我都系钟意去广州酒家食。

再有就系奶黄包，佢度好似叫流沙凤凰包，系真系起沙果种，香浓软滑，正！其实生肉包都好好味，嘻嘻。。因为依家出面搵唔到好食既蒸包店，所以生肉包基本上都系我每次必点既点心。

再嚟就咩干蒸、虾饺、牛肉干蒸果类，样样试都唔错既，但系除左呢D，仲可以试下个香茜饺，皮就同虾饺一样，馅料就清淡D，夏天食唔错。

再有一个就系我好钟意食既腐皮卷，喺蒸既，好钟意个个腐皮，以前嫌佢馅料入面既肉多得滞，有少少油腻，上个星期去食，嗯，改进左，肉少佐，加左D沙葛丝，觉得好左好多，正~~

至于榴莲酥，其实都好食既，但系个人觉得佢入面既榴莲应该唔多，食落唔系太觉榴莲既香味，反而觉得入面既馅比较似奶黄包入面既奶黄（唔系起沙果只奶黄），但系个酥面就做得唔错既。

其他既懒得写，自己去试啦~~

呃。。不过呢排2楼装修紧，等位既情况好似严重左。。要去就早D去排位了~~

推荐菜: 生肉包  流沙凤凰包  腐皮卷

标签: 老字号  早茶

交通停车: 无

• 09-07-29 13:18
• |
• 回应
• |
• 送鲜花(2)

泮溪酒家

广州荔湾区龙津西路151号(近荔枝湾)

• valensisme
• 口味:1
• 环境:1
• 服务:2
• 人均:￥40

好耐无去过泮溪饮早茶，上个周末岩同屋企人去左次。

系统一系门口拿筹等位既，无得拣去边个厅，好凄惨地比佢分左去右手边既厅，仲要系，佢个厅某个位置系高作少少既，我地就坐系高左少少既--隔离，D服务员行嚟行去，我成日觉得食紧尘。

再有就系果个厅喺唔够冷气既，我全场都系度搽汗，咁既环境，我觉得收5蚊茶位，唔多抵罗。

讲翻食物。
艇仔粥我无试，阿妈食左，话粥底唔错，OK啦。

传统点心马蹄糕，好似无咩特别，但系唔会差。

拉肠，都系觉得粉浆唔够杰，个人都系钟意广州酒家。

生肉包，面粉唔算太靓，但系都算OK啦，最最觉得睇唔惯既，系佢既馅料入面加左葱，同埋唔知系馅料既粉加得多得滞，定系佢系翻蒸既，佢既肉馅系痴埋一旧既， 唔系咁钟意。

上素腐皮卷，一送上来，睇落唔错，但系食罗就未算满意。腐皮无问题，D汁都OK，但系入面既斋，遮系D云耳吖，金针啊咁，就觉得煮得唔够火候，我觉得韧，或者钟意爽脆既会钟意挂。同埋，个人觉得成个味道太斋了，如果馅入面加少少肉，煮翻耐D，会好味D噶，呃。。不过加左肉就唔系斋甘罗。

云吞面，D面偏硬，但系唔钟意佢个云吞皮，系厚皮，唔系薄薄既果种，所以某D位置系食到云吞皮系未煮透，系硬既，我都系钟意薄既云吞皮多D。

推荐菜: 点心

标签: 老字号

• 09-08-05 15:55
• |
• 回应
• |
• 送鲜花(2)

春夏秋冬澳门火锅店

广州越秀区华乐路34号广怡大厦3楼301室(近花园酒店)

• valensisme
• 口味:3
• 环境:2
• 服务:2
• 人均:￥60

上次去食果阵系做紧特价，55蚊任食，汤低就另计，18蚊。价格就见仁见智啦，我就觉得OK罗。
嘢食方面，个人觉得最好味既系芝士牛肉丸，入面D芝士流出来，加埋D牛肉，会滑好多吓。虾滑都唔错，够爽口。唔钟意食生既生蚝，所以我喺放入去汤度稍稍烫左吓既，但系生蚝就觉得细只左D罗，不过，D墨鱼仔仲细只，可惜上次影既相删左，唔系既话摆上来，就可以睇到D超细size既墨鱼爪了。。
有一样嘢唔推荐食，就系虾子蟹粉丸，唔知点解，我觉得个馅系甜甜地既，感觉乖乖地。
汤底方面，个人觉得无咩特别，唔够小肥羊香，但系都唔会好似小肥羊咁食完会有一身味罗。

推荐菜: 芝士牛肉丸  虾滑

标签: 火锅  朋友聚餐

• 09-06-27 21:53
• |
• 回应
• |
• 送鲜花(1)

南信牛奶甜品专家

广州荔湾区第十甫路47号(近宝华路)

• valensisme
• 口味:3
• 环境:1
• 服务:1
• 人均:￥15

虽然就住系文昌路，但喺个人好懒，一般都唔会自己走去南信食野，但系只要同朋友一齐行上下九，咁就几乎次次都必定帮衬啦。。而且喺次次都食到好饱，好夸张果只添~~

南信系甜品起家既，据讲佢既甜品种种都唔错，但喺我唔系太钟意食甜嘢，所以，最多都系耐唔耐食下双皮奶，其他既我无咩试，但系同事试过木瓜炖水牛奶，就话都好正吓~~

好奇怪地，我去南信一般都系食所谓既咸品，至爱就系牛三星汤，其实酸辣牛三星汤仲正吖，不过惊热气，好多时都系忍口食牛三星汤就算，唔敢食酸辣既，但系唔怕热气不妨试下，真材实料又开胃，超级好味~~

如果果日无食双皮奶，就会系牛三星汤之余再点多样，有时会同朋友share一个炒面或者鲜虾云吞，再有时就自己食个艇仔粥，最最夸张果次系自己一个人食左个牛三星汤+炒面，直投吓死隔离枱。。哇咔咔。。

讲翻D嘢食，牛三星之外既又一最爱就系果度既艇仔粥了，粥底够绵，D料又足喔，真系好唔错。至于炒面，好似好少人推荐炒面，但喺我就好钟意，试过一次之后，成日去亲都逼个朋友陪我share个面。其实唔止炒面，果度既汤面都唔错葛，虽然唔系做面起家，但系同纯粹既面店比，佢既面都唔会差。

其他既仲试过剩云吞，做得几好葛，以前同同学去，就会必点呢个，同埋炸酱面，但系依家觉得D炸酱有D油腻既感觉，就好耐无食了。

仲有好多其他既嘢未有机会试，因为D牛三星既诱惑实在太大，但喺点左个牛三星之后，又无太多既胃容量可以尝试其他野，so。。。其他既以后慢慢试，试完再写~~

推荐菜: 双皮奶  姜撞奶  牛三星  鲜虾云吞  艇仔粥  炒面

标签: 老字号  甜品  小吃

交通停车: 无

• 09-07-29 13:54
• |
• 回应
• |
• 送鲜花(1)

坚记面店

广州荔湾区长寿东路299号(近长寿路)

• valensisme
• 口味:0
• 环境:1
• 服务:1
• 人均:￥10

一路都想去试下坚记，果日难得同细佬经过，两条友就去左试。

睇下個價目表，哇~~都幾貴喔，细佬要既腩撈伊面大既，竟然要11蚊，我要既中既豬腸撈伊面，都要6蚊，喺咁咦就無左17蚊了。首先上既喺湯，嗯嗯，睇落去唔錯噶，系奶色既，其實飲落都系唔錯既，甚至乎，最後唯一令我滿意既，其實就剩系得個湯既遮。

閒事免提，都系講翻個面先，兩個撈面一上嚟，就有少少失望了，原來伊面系甘既樣既，軟綿綿甘，又易斷喔，一夾啟起身就會有斷既，一D都唔好食。呃~~~可能系一DD人啦，但系我就真系覺得D伊面唔好食羅。至於我既豬腸，都系覺得嘛嘛，個汁既芡打得太濃了，粉落得多得滯，搞到豬腸入面系可以擠出一D粉糰甘既也，味道就尚可以咁羅。细佬既牛腩就唔知了，佢一食到D面之後就開始猛搖頭了，睇嚟，不過不失掛--D腩。

其實果度除左有伊面，仲有普通既蛋面既，而且好似好多人都系食普通蛋面既，依家唔記得左網上寫堅記好食，究竟系寫蛋面呢，定系伊面？普通既蛋面雖然我地無食，但系睇人地食果D，好似D面都系嘛嘛遮，應該唔會太差，但系睇落都唔會好靚啊，不過網上堅記其實都系毀譽參半既，大把人話佢老字號，好好食，但系一樣大把人話佢好差，好難食羅。至於我，試過之後，都系支持難食既一方多D，起碼唔會推薦人地去羅。唉。。睇嚟都系阿媽厲害，佢一路都話堅記既野唔好食，所以雖然以前我地成日系果頭買送，但系佢從來就唔會帶我地去食堅記。有時老字號都系甘，就好似銀記咁，都系出名既老字號，但系，D野都系認真嘛嘛羅。

至于颇多人推荐既炸酱面，我无试到，但喺，应该都唔会再去试，真系对果间嘢无咩信心了。。

标签: 老字号  伊面

交通停车: 无

• 09-07-29 14:18
• |
• 回应
• |
• 送鲜花(1)

新兴饭店

广州海珠区前进路92-100号(近嘉汇华庭)

• valensisme
• 口味:3
• 环境:2
• 服务:3
• 人均:￥90

当时喺一时兴起，咁就上网搵左新兴既地址，冒雨去既，嗯，果度D服务人员好好嘎，会担住把打遮等你落车唔会啉亲。。
呃。。讲翻正题，按网上面既推介，我地叫左个羊腩煲，白切山东羊，仲有个烤羊小腿，羊脑焗蛋，同埋特价既乳鸽，甜品就要左半打羊奶挞。
个羊腩煲超正，好香吓，虽然，觉得有少少贵，但喺佢都对得起个价钱既。个人好钟意白切山东羊，清清地，同埋个酱汁都配得好好。至于个羊脑焗蛋，如果唔介意佢喺羊脑既话，其实都唔错噶，面头焗得好香，但系入面都系嫩既，同埋因为佢落左D原粒既蒜头，所以唔会觉得有异味罗。特价既乳鸽，都唔错，喺新鲜既乳鸽整既，唔会喺雪过既，同埋佢喺即叫即整，打算食既，最好就一坐落就点，费事要等得耐啊嘛。
果餐唯一觉得失望就系个烤羊小腿，虽然香料落得好足，闻落去好香，但喺食落就觉得烤得太干，唔多推介。但喺如果钟意食香口嘢既，都可以试试既。。
最后喺甜品，个羊奶挞好正，本来想试埋个酥皮羊奶既，但喺实在喺食得好饱，食唔落了，唯有下次啦。。

推荐菜: 羊腩煲  羊靴煲  白切东山羊  羊奶挞

标签: 羊肉  粤菜  朋友聚餐

• 09-06-27 19:02
• |
• 回应
• |
• 送鲜花

顺记冰室

广州荔湾区宝华路85号(近宝华面店)

• valensisme
• 口味:2
• 环境:1
• 服务:2
• 人均:￥10

以前读书果阵同同学行上下九，就会时不时入去食雪糕，椰子同榴莲雪糕无试，我一路都系钟意芒果雪糕，对一个唔多钟意食甜品既人都觉得佢好正。
其实除左甜品，顺记仲有好多其他野食既，但系如果喺食粉面果类，我就会情愿去翻南信罗。

推荐菜: 芒果雪糕

标签: 老字号  甜品  逛街时候可以吃吃  雪糕  老子号

• 09-11-03 11:41
• |
• 回应
• |
• 送鲜花

陈添记

广州荔湾区宝华路59号侧十五甫三巷内进第2档

• valensisme
• 口味:3
• 环境:1
• 服务:1
• 人均:￥15

老字号，环境一般般，但系如果系周末去，就会发觉超级多人。
D鱼皮好正，好爽，而且虽然会雪过，但系唔会雪到实晒，食落系好爽既，系暂时食过既最好食既一间。
除左鱼皮，仲有艇仔粥同肠粉。艇仔粥仲OK，可以一试，同埋鱼皮一齐食就喺了。
但系D肠粉个人觉得唔多好食，可能习惯左有腩汁同埋酱料既肠粉，依家食翻D斋得酱油既，就觉得唔好食。

推荐菜: 爽滑鱼皮  艇仔粥

标签: 老字号  露天位

• 09-11-03 11:32
• |
• 回应
• |
• 送鲜花

牛羊杂汤

广州荔湾区西华路金花直街金花庙后街3号(近金平大厦)

• valensisme
• 口味:4
• 环境:1
• 服务:1
• 人均:￥10

系住喺附近既朋友带去试既，各自要左碗牛羊杂汤，另外再要左碗萝卜牛杂添。

D牛羊杂汤超级正，佢会加左少少韭菜同酸萝卜，夹埋一齐，D味道好好，牛杂亦都洗得好干净。

但系碗萝卜牛杂就觉得麻麻，无咩特别好食，唯一可以讲得既就系萝卜尚算入味既，去食既话，都系食牛羊杂汤就好了。

牛三星未试过，下次去再试~~~

推荐菜: 牛羊杂汤

标签: 小吃

• 09-08-05 15:29
• |
• 回应
• |
• 送鲜花

莲香楼(第十甫路一店)

广州荔湾区第十甫路67号(近世纪假日酒店)

• valensisme
• 口味:1
• 环境:1
• 服务:2
• 人均:￥20

周末行完白云山，个朋友话突然间好挂住酒楼既拉肠，于是，喺白云山落来之后，直奔广州酒家，点知去到先知唔开下午茶，跟住转到陶陶居，超多人等位，最惨既系，你想等都无得你等，人地唔派筹了，无办法，最后去左莲香，竟然系唔使等位既。

上到二楼，无细枱，系同其他人搭台既，坐落冷气系够既，无网上面讲既冷气不足既问题，可能系一间间房挂。

我地两个人点左5碟嘢，再加个炒面打包。打包返屋企既炒面，细佬话炒得好咸，兼炒得有D过火，唔多好食。我地堂食既几个点心，就马马虎虎。马蹄糕无咩特别好食或难食，牛肉丸，佢度有似有几种，我地同台既就有人点左另外既，我点既果只就系蒸既，但系芫茜太多，食落D味抢左。至于果个拉肠，我地系食蒸斋肠，遮系入面有云耳，冬菇果种。但系佢既粉浆调得唔够杰，水左少少，唔钟意，而且，佢入面仲有面筋，感觉怪怪地。

如果系啉住入去坐地饮吓茶，休息下，都仲系唔错既，起码唔使等位，价钱亦唔贵，但系就唔好抱咩期望D嘢食会点好食罗。

楼下既饼，我最钟意就系佢既老婆饼啦，如果唔系拿嚟送礼，或者讲你要送既果个人其实比较熟，唔系太介意包装既，一定要买散装既，果D先新鲜，送礼既盒装，D酥面已经会开始干身，曾几何时佢剩系出送礼既盒装，而唔卖散装，我买过一次之后就唔再买，依家出翻散装，就会买，盒装既真系会比散装既难食好多，干好多。

其他既酥，因为我唔多钟意甜食，好少会买，叉烧酥就有买过，D馅既未到我觉得几似五仁月饼既味道，钟意食五仁月饼既，应该会钟意。

推荐菜: 老婆饼

标签: 老字号

• 09-08-04 15:58
• |
• 回应
• |
• 送鲜花