身為大埔人，想搵好食野醫肚多數都係會去八妹雞煲嗰邊覓食。最近知道就喺八妹隔離開咗一間專食牛嘅扒房，愛牛又愛西餐嘅我當然要去試試。
餐廳就係轉角位置非常顯眼， 餐廳嘅色調用上優雅嘅貴族藍色做主調，加上燈光柔和昏暗，好有fine dining 嘅情調，而重點係價錢親民。
餐廳暫時仲喺試業階段，暫提供tasting menu, 成個set 都係以牛作主題。
頂級牛肝菌忌廉湯
牛related 嘅菌湯， Creamy 十足亦唔會搶哂菇菌嘅味道。
低溫慢煮煙燻牛舌沙律
沙律偏向日式感覺，坊間比較少食到牛舌嘅沙律。薄切嘅牛舌油脂分布極靚，口感唔韌仲每啖都有煙燻香味。值得一讚羅馬生菜無切碎令擺盤賣相吸引，沙律汁唔太搶味好加分。
黑松露鵝肝醬威靈頓牛柳
高難度嘅菜式，整得色香味俱全仲要生熟度岩岩好已經難，最重要係外層酥皮切完唔離邊。牛柳焗到medium 剛剛好，中心部分嘅肉色超靚，食落口感軟綿綿！而味道方而嘅層次感分明，先係入口嘅酥皮香，中層嘅黑松露牛肝菌醬再慢慢帶出牛柳嘅肉香，最後到釀入牛柳入面嘅鵝肝。味道由淡到濃漸入佳境。
英式傳統經典布袋牛柳
有別於坊間嘅布袋牛，Ox Lounge 嘅布袋牛最外層由煙肉包裹住牛柳，牛柳入面再包住濃味嘅焗蠔，整體風格係濃厚味道嘅牛柳。
頂級比利時心太軟
香濃嘅Dark Chocolate, 一啲都唔死甜。另外仲會配上Ox Lounge 自家製嘅朱古力以及雲尼拿果仁雪糕，方形細細粒份量剛好。
X
Dark rum, Kahlua, milk, coffee
Creamy 嘅cocktail, 遍nutty 嘅咖啡撞埋Kahlua 同 rum 有少少似 Irish coffee
Well Done
Martini, Triple Sec, orange juice
見到Triple Sec 同 橙汁嘅 combination 就知係Citrus 風嘅cocktail, 橙味清淡再加上隱約嘅鹽味，好有熱帶氣候嘅感覺。
